Marco Picci est nasçu in Carbonia (CI), in su Sulcis, S-O de sa Sardinnya, su 14/08/1974; bivit e traballat in Perdaxius (CI), a 9 Km de Carbonia. Est unu piçocu scallentau de pintura cun ákua pintada, ténniga umperada prus pagu poita est traballosa e no si podent fai currigiduras mancai pitikeddas; mancumali custu, s’ákua pintada alabantzat meda sa precisioni, sa luxi e sa cica de is coloris, luxentis e trasluxentis.
Marco at cumentzau a disinnyai in su 1992 imparendi a solu, adelantau de sa passioni ki teniat jai de pitikeddu. At cumentzau a studyai sa ténniga, umperendi su làpis, su pastellu, is craboneddus e sa kina, arrinescendi aici a si fai un’arrastu artistigu personali e ki s’arreconoscit. De su 1995 at cumentzau a umperai sa ténniga de s’ákua pintada, sçoberendi ritratus e sugetus personalis meda, pintadus cun ténniga «iperrealista» (meda símbili a su veru, a commenti una fotografia); gratzias a-i custus si biri sa personalidadi forti, ki incrarat sa stima cosa sua po sa maestria ténniga, sa finesa de arti e su traballu pibincu po is particolaris. Marco traballendi Narat Marco: «Apu sempri stimau meda sa pintura realista, a cumentzai de is maistus arrinascimentalis e de su ‘600 (Caravaggio, Artemisia Gentileschi etc.), de su ‘800 (Ingres, W.Turner) e is pintoris e gràfigus de su ‘900 (Pietro Annigoni, Renzo Vespignani) fintzas a is pintoris iperrealistus europeus (Franz Gertsch, Gerhard Richter) e americanus de s’inghitzu de is annos ’70s (Richard Estes, Robert Bechtle, Ralph Goings). De custus urtimus artistas apu pigau ispiradura po is pinturas cun ákua pintada cosa mia, cali est una ténniga un pagu rara po custu stili, poita si costumada umperai po su prusu coloris a ollu o acrílicus. Difatis sa mia personali cica bolit uniri sa naturalesa de is coloris e sa trasluxesa e s’amodiesa de s’ákua pintada ad un’esprimidura reali meda de su sugetu, otennia cun manu meda abili in d-unu traballu acorau po is particularis e una artziada de is cuntrastus. Defatu, deu cicu de otenni un’equilíbriu de is contrastus de is craruscuríus e sa fortza de su colori. Su colori depit «bessidi» de sa pintura y arrapinnai s’atentzioni de su ki cástiat. In custu, imoi sa cica mia a pitzus de s’ákua pintada si distínghiri de s’umperu prus crassigu de custa ténniga (a commenti sa ténniga de su lentori («guazzo») e totu s’atras ákua pintadas ki tenent svanessiduras de trassa indefinia). Sa stima cosa mia po sa pintura cun ákua pintada abratzat totu is ténnigas suas e mi spingit a sprorai is bisuras ki funt sempri stétias aminudadas» Marco traballendi Marco, po sa pintura cun akua pintada, costumat usai paperi Winsor & Newton cun grammadura lebia meda (gr. 187), coloris in tubetu e pintzellus serie 7, sempri Winsor & Newton.
Premio ARTE 2006 (cuncursu fatu de s’omonimu jorronali famau): ponendisì cun is primis cincu de sa setzioni «grafica», Marco at amostau su kuadru Dopo la pioggia de su 11 a su 22 de mese de ladamini 2006 in su Palazzo della Permanente di Milano.
Marco at pigau parti a cuncursus natzionalis et internatzionalis, arricirendi arriconoscimentus a cumenti:
Premio Nazionale «Comune di Trivero», 2001;
Internazionale «Agazzi», cuncursu de pintura cun akua pintada, 2002;
Premio Nazionale «Noè Bordignon», 2003;
1° premiu «Concorso nazionale di acquerello Mario Dibi», 2003 (cun su kuadru Progress)
D’agatàis in is urtimas imprentaduras de «Guida agli Artisti Sardi Contemporanei» , de Gavino Colomo – ed. La Nuova Europa, Firenze.
